رووووز معشوق الكل

الطريقة:

اول حاجة درت الروز فلما يتنقع ساعة باش تروح الريحة ويروح النشا تاعه مبعد صفيت وشللت مليح وخليته يقطر

ثانيا درت اللحم يتقلا في شوية سمن وزيت ومبعد حطيت بصلة مقطعة وقرنفل ونجمة لرض وقرفة وهيل ورند وقليت مليييييييح ومبعد زدت طماطم معلبة و سكنجبير طازج لي معندهاش دير غبرة ودرت فلفل عكري وكركم وشوية كمون وعطور الروز و زوج حبات مكعب مرق دامتي تاع السمن الحر و تاع الزعفران الحر ولي معندهاش دير مكعب المرق العادي ومرقت بلما حامي وخليته يطيب نص طياب مبعد نحيت اللحم على جهة ودرت خضرة لي هي زرودية، كورجات، دنجال، كرنب، بطاطا وخليتهم يطيب كي طابو طفيت وحطيت قرن فلفل اخضر حار وبلعت الطاجين باش تفوح ريحة الحار

من جهة حكم كوكوط صغيرة درت فيها هاداك اللحم مع شوية زيت وكاس ماء وشوية فلفل كحل وحطيتها فوق النار تكون قلييلة ومبعد كي طاب اللحم صفيت هاديك المرقة تاعو وخليت اللحم يتحمر شويييية

ومبعد هاداك الروز قليته غي شوية فالسمن وزدت معاه الملح وعطور الروز ومبعد بديت نحط عليه مرقة حتى تغطا وبلعت عليه بلپاپيي اليمنيوم ونقصت النار حتى طاب

كي حطيت فالطبسي سقيت من فوق بهاديك المرقة اللحم (تكون غي شوية وعاقدة) وبالصحة